« NAFARROA BAI, NAFARROA ERALDATZEKO GILTZA | Página de inicio | Aralarrek Nafarroan alderdien mahaia sortu dezan eskatu dio Miguel Sanzi »
28/02/06
Txentxo Jimenezi elakrrizketa Berrian
«Nafarroa Bai koalizioan arazoak daude, baina ez oztopo gaindiezinik»
Aralar, EA, EAJ eta Batzarre alderdiek osatzen duten Nafarroa Bai koalizioak 2007ko hauteskundeetarako akordioa martxoaren bukaerarako lortuko duela iragarri du Txentxo Jimenezek.
iRENE ARRIZURIETA - IRUÑEA (Berria egunkaria)
Nafarroako Parlamentuko osoko bilkurak utzi dion tarte batean harrapatu dugu Txentxo Jimenez (Jaen, Espainia, 1957). Galderei erantzun ondoren bilkurara itzuli da. Egun osoa Ganberan emanen du.
Aralar, EA, EAJ eta Batzarre alderdiek osatzen duzuen Nafarroa Bai koalizioa 2007ko udal eta foru hauteskundeetara aurkeztuko da. Noizko egonen da prest egitaraua, zerrenda eta alderdi bakoitzaren parte-hartzea zehaztuko duen akordioa?
Eztabaida horretan gabiltza, eta martxoaren bukaerarako itxiko da akordioa: koalizioaren erabaki taldeak, koalizioak, zerrenden osaketa eta egitaraua. Banaketa ordena ezarriko da, baina ez da izenik aipatuko. Orain izenak zehaztea arduragabekeria litzateke. Oraindik denbora asko falta da. Erakunde garrantzitsuenetako zerrendak eta Iruñeko Udala eta Nafarroako Parlamentua dira zehaztu beharrekoak. Gainerako udaletako egoera aztertu egin beharko da.
Negoziazioak uste baino zailago doaz?
Negoziazioak zailak izaten ari dira, hori logikoa da, baina ez dago nondik atera ez dakigun egoera itogarririk. Alderdi bakoitzak zilegi deritzona defendatzen du, baina malgutasun bat izan behar dugu akordioak lortzeko. Ez dago oztopo gaindiezinik. Puntu batzuk askatzea besteak baino gehiago kostatzen ari zaigu.
Zailtasunetako bat zerrendak osatzea da. Duela lau urteko emaitzak aintzat hartuz, zerrendaburuak Aralarrekoa izan beharko luke, baina EAk ez du hori onartzen. Irtenbidea zerrendaburu independente bat jartzea da?
Esan diezazukedan bakarra da zerrendaburu izanen ez diren 40 lagunen izena, eta izen horien artean ni nagoela, baina ez dizkizut esanen aukerak dituzten hiru edo lau lagunen izenak.
Eta zein dira 40 izen horiek?
Eztabaidatzen ari gara. Arduragabekeria litzateke modu egokian moldatzeko egiten ari garen ahalegina zapuztea.
Negoziazioetan zein zeregin ari dira izaten koalizioko independenteak?
Nafarroa Bairen etorkizuneko egitura nola zehaztu erabakitzeko egiten ari garen eztabaidan hartu duten jarrera oso azkarra izan da. Aintzat hartu dute lau alderdien arteko akordioa dela eta alde batera geratu dira, era diskretuan. Formalki ez dira ari eztabaidan parte hartzen, ez batzuen alde ez besteen aurka. Aukeratu duten bidea oso ona da, alderdiei laguntzen digulako.
EAren eta Aralarren artean dago desadostasun handiena. Egoera hobera doa?
Akordioa noiz itxi zen gakoa. Hori zehaztu dugu, eta iragarritako datekin lanean ari gara. Eztabaida ez da mugatzen zerrendetara. Koalizioak zein erabaki talde izanen dituen: erabakiak hartuko dituen talde iraunkorra; tarteko beste erabaki gune bat, kargu publikoei eta sektoreetako jendeari tokia uzteko; batzar orokor bat... Garrantzitsua da programa adostea ere, guztiak lotzen gaituelako. Adostuak ez dauden gaiak ere aterako dira jardun politikoan, eta horietan erabakiak nola hartu zehazteko sistema aurkitu behar da. Aho bakarrez egiteak blokeoa ekarriko luke eta, horregatik, txandakako sistema ezarri behar da. Gai funtsezkoak dira, halaber, erabakien muga non jarriko den eta gehiengoarekin ados ez dagoenari bere irizpideak defendatzeko zein tarte geldituko zaion.
Koalizioan parte hartzeko gonbitari ezetz erantzun diote IUN-NEBk eta Batasunak. Batasuna haratago joan da. Zuen proposamena baztertzailea dela dio eta berak eman dituela beti kolaborazioa egiteko pausoak.
Gure asmoa ez zen koalizioa osatzen dugun lau alderdietara ixtea. IUN-NEBi eta Batasunari eginiko gonbita zintzoa da; oraindik guztiz taxutu gabe dagoen koalizioa da. IUN-NEBk ez dela sartuko esan digu. Batasunak Nafarroa Bain ez sartzeko erabakia hartua du, baina beste argudio batzuk bilatzen ari da. Beti ez dugula gonbidatu dio, eta hori ez da hala. Bergarako Proposamena plazaratu zutenean eta Espainiako Kongresurako Nafarroa Bai eratzeko garaian, bilera asko egin ziren, Nafarroa Bai eta Batasunaren artean eta Batasuna eta Aralarren artean. Halako batean akordioa itxita zegoela zirudien, eta Batasuna koalizioa onartzeko prest zela, baina azkenean aurrera ez egitea erabaki zuten. Batasunarekin beti egon da bidea irekita. Gonbita bere hartan dago.
Bake prozesua abiatzea eta prozesuan Nafarroaren parte-hartzea zehaztea dela lehentasuna dio Batasunak, eta ez 2007ko bozak.
Bide politikoak soilik erabiltzen ditugun taldeentzat, hauteskundeak une egokia dira gizartean dugun sostengua ikusteko. Indar politikoentzat hauteskundeak egiaren unea dira, are gehiago Nafarroako gizartea eta erakundeak aldatzeko helburua badugu. Hauteskundeen kontzeptua gutxiespen gisara erabiltzeak ez du zentzurik. Lau urtean egin duzun lanari oniritzia emateko modu bat da. Okerragoa litzateke norbaitek bake prozesuaren eta normalizazioaren denborak kontrolatzea elektoralismoa egiteko. Hori ez luke gizarteak ulertuko, eta onartezina litzateke.
Bake prozesuaren hasiera guztien ahotan dago. Batetik, alderdien mahaia eratzeko ahaleginak daude, sindikatuen arteko bilerak. Bestetik, Auzitegi Nazionalaren erabakiak daude. ETAk atentatuak egiten jarraitzen du. Nola ulertu behar da une hau?
Itxaropentsu gaude, baina kezkatuta ere bai. Itxaropentsu gaude, alde guztietatik etortzen diren keinuek eta esanek baikorrak izan behar dugula esaten digutelako, baina gertaerek aurkakoa pentsatzera bultzatzen gaituzte. ETAk atentatuak egiten jarraitzen du, eta Estatuak ere betiko espetxe politikarekin jarraitzen du, etakideen zigorren aldaketekin, 18/98 sumarioarekin. Bi aldeen arteko kokagune gerra izateak kezkatzen gaitu.
UPNk ez du prozesuan sinesten, eta Nafarroak ez duela trukerako txanpon izan behar exijitu du.
UPNk eta PPk jarrera bera dute. Nafarroaren argudioa erabiltzen ari dira, ez Nafarroa defendatzeko, prozesua trabatzeko baizik. Nafarroa giltzarri bilakatzen ari da berriro, batez ere prozesuak aurrera ez egiteko traba moduan. Gatazkaren arazoa guztiok dugu. Eztabaida mahai bakarrean edo bitan planteatzea da irtenbidea. Praktikan bideragarriagoa da bi mahai eratzea, bat Baskongadetan eta bestea Nafarroan. Oso zaila da UPN eta PSN, CDN ez dakit, Baskongadetako mahaian esertzea. Bideragarriagoa da bi mahai eratzea, baina bietan gai bera egonen da, erabakitzeko eskubidea, Nafarroan Nafarroarentzat eta Baskongadetan Baskongadentzat.
Zein izanen da PSNren jarrera?
Ezin da izan gatazka moldatzeko oztopo. Bere alderdia bultzatzaile nagusietako bat da Madrilen eta Baskongadetan. Bere jarrera gertakarietara egokitu beharko du.Nafarroako Parlamentuan autogobernu ponentziarako lan taldea eratu da. PSN, UPN eta CDN alderdiek esan dute ez dutela Foru Hobekuntzaren aldaketa sakonik onartuko . Zer espero du Aralarrek?
Ez dugu itxaropen handirik. Kasik hobea izanen da eztabaida hurrengo legegintzaldian bukatzea eta ez honetan. Agian beste testuinguru batean gaude hurrengo legegintzaldian, eta aldaketa gehiago bultza daitezke. Gai garrantzitsuetan UPN, CDN eta PSN aurka daude. Nafarroaren estatusean aldaketa handiak badira galdeketa eginen dela diote, eta bestela Parlamentuak erabakiko duela galdeketa egin ala ez. Ez daude euskararen ofizialtasuna onartzeko prest. Jarrera epela dute.
16:15 Anotado en Berriak | Permalink | Enviar a Email